معالم الحشرية عند الموظف الحكومي 1

الموظف الحكومي المصري علامة من علامات التاريخ، بالإضافة للآثار في ربوع مصر فإن الموظف الحكومي يستحق يكون أحد آثار العصر الحديث. تطور الموظف الحكومي المصري  غير معروف بالنسبة لي إذا كان تم كتابته وتقنينه أم لا لكن المعروف بالنسبة لي هو ما أسمعه من تجارب الجيل السابق كموظفين موقرين في الجهاز الإداري للدولة!

وتجربتي في مجتمع العمل الحكومي لمدة 3 سنوات ومستمرين!

أكتر صفة مشهور بيها الموظف الحكومي هي الحشرية! إنسان بيحشر نفسه فيما لا يعنيه! الأمر الطبيعي إنه يتدخل فقط في أمور زملائه من الموظفين لكن يمتد الأمر للتدخل في أمور المواطن المطحون اللي بييجي يخلص ورقة بيجري وراها من ساعة الفجر!

إيه هي معالم “الحشرية” عند الموظف الحكومي؟

مبدئياً الموظف الحكومي بيسمعك، بيسمعك كويس أوي، مش بس عشان هو مهتم بإنه يعرف كل تفصيلة عن حياتك بينما انت ممكن تكون متعرفش اسمه الأخير إيه مع إنه زميلك لكن عشان يرضي فضوله في الحديث!

يحضرني في هذا الشأن بعد ما توظفت في المصلحة الحكومية اللي باشتغل فيها، وأنا زي أي موظف بيقوم يخلص الأوراق المطلوبة منه قانوناً يخلصها بموجب مصلحة العمل، إن في موظفات كانوا يعرفوا اسمي بالكامل، كلية إيه وحتى محل إقامتي! وكان الموقف بيحصل مع كل الدفعة اللي اتعينت معايا في نفس الوقت. نفس الدفعة من ناحية التعيين مش من ناحية التخرج من الجامعة باختلاف أعمارنا!

الموضوع في أغلب الأوقات مضحك جداً، خصوصاً لما يحصل موقف قدامك بيتعرض فيه أحد الزملاء لتدخل زميل آخر في أموره. إلا إن الأمر وإن كان فيه بعضاً من الكوميديا في بعض الأوقات، إلا إنه كتير بيكون مؤذي نفسياً.

بيوصل الأمر إن لو حصلت مصادفة غريبة وأحد الزملاء شافك بتؤدي مهام حياتك العادية من تسوق أو حتى خروج مع العائلة، هتلاقي المصلحة الحكومية في اليوم التاني بتسألك أخبار الخروجة إيه؟

نكمل سوا المرة الجاية!

آية-

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s